మనం ఎటుపోతున్నామో, ఎక్కడ ఉన్నామో తెలుసుకోవాలంటే మధ్య మధ్య ఒక్కసారి ఆగి, వెనక్కి తిరిగి చూసుకోవడం మంచిది. అలా చూసుకుంటే మనం తిన్నగా నడుస్తున్నామా, డొంక తిరుగుళ్ళు తిరుగుతున్నామా, అసలు ముందుకు పోతున్నామా, వెనక్కి పోతున్నామా, గానుగెద్దులాగా గుండ్రంగా తిరుగుతున్నామా అనేది తెలుస్తుంది. మనకొక గమ్యం అంటూ ఉందనుకుంటే, ఆ గమ్యం దిశగా నడుస్తున్నామా, లేదా అనేది చూసుకుంటూ ఉండాలి. ఎటో అటు నడుస్తూ పోవడమే మన పరమాశయం కాదు కదా!
రామకృష్ణ దర్శకత్వంలో వెలువడిన 'శభాష్ రాజా' తెలుగు చిత్రం (డబ్బింగు కాదు) ఇంతకు ముందు సి.ఎస్. రావు దర్శకత్వం క్రింద సుందర్ లాల్ సహతా నిర్మించిన చిత్రాల స్థాయిలో ఉంది. శతదినోత్సవ చిత్రాల లక్షణాలను మేళవించుకున్న ఈ చిత్రం మన ప్రేక్షకులకు కావలసిన వినోదాన్ని కావలసినంతగా అందించగలదు.
నవ్య కళామందిర్ వారి తెలుగు డబ్బింగ్ చిత్రం 'స్త్రీ హృదయం'. ఈ సంవత్సరం ఇంతవరకు విడుదలయిన డబ్బింగ్ చిత్రాలన్నింటికన్న మెరుగుగా ఉంది. సామాన్య ప్రేక్షకజనాన్ని అలరించడానికి కావలసిన అన్ని హంగులతోపాటు, కాస్తంత కళను కూడా మేళవించి సగటు స్థాయి కన్న మిన్నగా ఈ చిత్రాన్ని రూపొందించాడు దర్శకుడు శ్రీధర్. రజతోత్సవ చిత్రం 'పెళ్ళి కానుక' ద్వారా సంపాదించుకున్న పేరును ఆయన నిలబెట్టుకున్నాడు. డబ్ చేయడానికి బదులు తెలుగు నటీనటులతో పునర్నిర్మించినట్లయితే ఈ చిత్రం శతదినోత్సవాలు జరుపుకోగలిగేది.
శాంతికళా ఫిలింస్ వారి 'శాంత' చిత్రం తెలుగు చిత్రాల సంప్రదాయానికి అనుగుణంగా, పామర జనరంజకంగా రూపొందింది. ఇంతకాలం తెలుగులో ఆర్థిక విజయాన్ని సాధించిన మెజారిటీ చిత్రాల లక్షణాలు-అనగా బాక్సాఫీస్ లక్షణాలు అని చెప్పబడేవీ ఈ చిత్రంలో ఉన్నాయి. శృంగార-కరుణ, హాస్య, రౌద్ర, బీభత్స, భయానక రసాలని నిర్మాతలచే పిలువబడుతున్న కొన్ని అంశాలు కూడా ఈ చిత్రం నిండా పుష్కలంగా ఉన్నాయి. పవిత్ర ప్రేమ, త్యాగం, సాహసం మొదలయినవి ఈ చిత్రం నిండా క్రిక్కిరిసి ఉన్నాయి.
విలన్ (రాజనాల) చేసిన హత్యానేరం హీరో (జగ్గయ్య) పై పడడం, హీరో హీరోయిన్ (దేవిక) ఇంట్లో అజ్ఞాతవాసం చేయడం, ఇన్ స్పెక్టరైన బావగారు (రామకృష్ణ) అతనిని తరుముకుంటూ రావడం, చెల్లెలు (కృష్ణకుమారి) రక్షించడం, చివరకు హంతకుడు పట్టుబడటం 'కన్నకొడుకు' చిత్రంలోని కథాంశం. ఈ కథ, అందులోని సన్నివేశాలు, సంభాషణలు, పాటలు, రాగాలు, మనుషులు, మేడలు, తోటలు అన్నీ తెలుగు ప్రేక్షకులకు చిరపరిచితములైనవే. రాజనాల ఎప్పుడు వికటాట్టహాసం చేయబోతున్నాడో, జగ్గయ్య ఎప్పుడు ఎలాంటి పాట పాడబోతున్నాడో, స్వప్నం సీను ఎప్పుడు వస్తుందో, దేవిక ఎప్పుడు డాన్సు చెయ్యబోతుందో ప్రేక్షకులకు ముందే తెలిసిపోతుంది. కంఠతా వచ్చిన పద్యాన్ని మళ్ళీ ఒకసారి చదివినట్టు ఈ చిత్రాన్ని ప్రేక్షకులు చాలా ఉత్సాహంగానే చూస్తారు. చివరి స్టంటు సీనుల్లో ఈలకూడా కొడతారు.
తెలుగు పౌరాణిక చిత్రాలు ఈనాడు ఈ స్థాయికి వచ్చాయంటే అందుకు కారణం ముఖ్యంగా కడారు నాగభూషణం గారు, చిత్రపు నారాయణ మూర్తి గారు అని చెప్పక తప్పదు. ఇది వారి హస్తవాసియే. తెలుగు సగటు ప్రేక్షకులకు కావలసిన మూసలో పౌరాణిక చిత్రాలను పోతపోయడం వారికి జన్మతః అబ్బిన విద్యకాబోలుననిపిస్తుంది. ఇద్దరి శైలి దాదాపు ఒక్క విధంగానే అగుపిస్తుంది. భారీ తారాగణం లేకుండా, అట్టే ఆయాసపడకుండా ప్రేక్షకులకు సూక్ష్మంలో మోక్షం చూపించడానికి వారు ప్రయత్నిస్తూ ఉంటారు.
ఆదుర్తి సుబ్బారావు లోగడ నిర్మించిన చిత్రాల కోవలోకే వస్తుంది మహేంద్రా పిక్చర్స్ వారి 'కృష్ణప్రేమ' చిత్రం. కాకపోతే ఇది పౌరాణిక చిత్రం. అదొక్కటే తేడా. ఆదుర్తి చిత్రాల పట్ల ఆసక్తి గల ప్రేక్షకులకు ఈ చిత్రం ఆశాభంగం కలిగించదనే చెప్పవచ్చును. ఆయన చిత్రాలన్నింటి వలెనే ఈ చిత్రంలో కూడా వినోదంపాలు హెచ్చుగా ఉంది.
